Делчево, 24 април 2020 (МИА) – По повод Рамазан Бајрам, во Делчево дистрибуирани 20 пакети со храна наменети за верници од муслиманска вероисповед кои ги постат Рамазанските пости. Иницијативата е на делчевскиот градоначалник Горан Трајковски, кој наместо традиционалната ифтарска вечера, која поради актуелната состојба со пандемијата од Ковид -19 е откажана, до џамискиот одбор на џамијата „Мехмед Фатих II“, донираше пакети со храна за верниците, како чин на продолжување на традицијата.
Упатувајки честитки до верниците, порача со молитва од дома, а не во џамија, верниците да ги практикуваат верските обреди, а со постот и верските обреди во домашна атмосфера полесно да се излезе од оваа ситуација.
– Ја користам оваа прилика и овој убав повод, за да испратам порака за соживот, љубов, почит. Традицијата го држи човекот длабоко за корените, а вербата во Бога и светото писмо независно дали е Куран или Библија, ја одредува душата и човечноста која го раѓа човекот преку неговите дела, постапки и почитта кон другите. Почитувани браќа, секогаш во сите периоди од развојот на Делчево, ние сме биле заедно. Заедно сме делеле болки, загуби, сме се радувале на убавите нешта, на Сонцето и на новите утра, на новиот живот, рече Трајковски.
Упати порака да продолжи заедничкото градење на иднината на градот.
-Секогаш да си подадеме рака, кога е потребно и да се почитуваме. Различностите го даваат спектарот, шаренилото кое го прават светот поубав. Во ова време да испратиме молитва за здравјето на секој поединец, а воедно посакувам и лесен пост и заеднички да придонесеме за радост, меѓучовечка толеранција и хармонија, додаде Трајковски. вс/ев/
