Утрински Весник
Македонија

Во Дебар десет дена без новозаразени со Ковид-19, контролните пунктови се повлекуваат

Во Дебар десет дена без новозаразени со Ковид-19, контролните пунктови се повлекуваат

Дебар,13 април 2020 (МИА) – Во Дебар и во изминатото деноноќие нема новодијагностицирани со Ковид-19, со што позитивен случај не е регистриран веќе десетти ден. Последните два случаја позитивни на Ковид-19 беа потврдени на 4 април, а одтогаш  до денеска нема нови случаи. Исто така, и пред тоа три дена по ред немаше новодијагностицирани.

Бројот на заразените останува 49 од нив двајца се од Центар Жупа, односно првозаразените сопружници, кај кои болеста беше дијагностицирана по нивното пристигнување од Италија. Од вкупниот број 16 се излекувани, 29 се на домашно лекување при што за осум од нив се чека резултат од второто тестирање.

За жал четворица починаа, од нив тројца мажи од Дебар и жена од Центар Жупа.

Дебар беше првото жариште на коронавирусот, па со одлука на Владата на 13 март беше прогласена кризна состојба за општините Дебар и Центар Жупа. Контролни полициски пунктови беа поставени кај месноста „Бошков Мост“ на регионалниот пат Дебар-Маврово, како и во близина на хидролектраната „Глобочица“ на патот кон Струга, поради тоа што на тој дел се приклучува кракот на патот кој води до селата од Жупа. По денешната одлука на Владата контролните пунктови се повлекуваат.

Кога беше прогласена кризната состојба, од 13 заразени колку што имаше во државава дури 11 беа од овие општини, девет од Дебар и двајца од селото Баланци, општина Центар Жупа. Во оваа општина освен првозаразените двајца сопружници до сега нема други заразени ниту сомнителни лица. вт/вј/

Извор: mia.mk

Можете да прочитате

Вучиќ–Сиљановска Давкова: Србија и Северна Македонија можат да понудат многу во лозарството и туризмот

Шумски пожар над охридските села Куратица и Опеница, на терен дејствуваат три ер-трактори

ДУИ да одговори – дали за време на нивните патувања избегнуваат скенери, вели Таравари