Скопје, 13 април 2020 (МИА) – Со поддршка од УСАИД и УНИЦЕФ, 2.350 пакети и хигиенски производи ќе бидат дистрибуирани за семејствата во државава од кои 1.000 во Шуто Оризари, 500 пакети за семејствата од населбата Тризла во Прилеп, 500 пакети за семејствата од Бајро во Битола, 250 пакети за семејствата од населбата Керамидница во Гостивар и 100 пакети за семејствата од населбата Црник во Делчево.
Ако сакаме да излеземе како победници во оваа битка, додаде премиерот, многу е важно да ги прифатиме и спроведуваме мерките за претпазливост како што е физичката дистанца, да ги сведеме контактите на најнеопходните и да го оневозможиме пренесувањето на вирусот.
Соединетите американски држави одвоија 1,1 милион американски долари во напорите за борба против КОВИД-19 во Северна Македонија преку грант од УСАИД. Од вкупната сума, 500 илјади долари се наменети за поддршка на напорите на Фондот за деца при Обединетите нации (УНИЦЕФ) кој ќе помогне во запирање на натамошното пренесување на Ковид-19 во земјата и во намалување на ефектите од пандемијата врз семејствата и децата, со фокус врз најранливите граѓани.
За време на посетата амбасадорката Брнз изјави дека чест и е да се приклучи кон УНИЦЕФ и Владата во оддавањето признание за работата на Црвениот крст и неговите волонтери кои несебично се даваат себеси за да помогнат соодветно да одговорот на кризата од Ковид-19. -Исто така, сакам да им се заблагодарам на Владата на Северна Македонија и на Министерството за труд и социјална политика кои ги предводат напорите за работа со најзагрозените граѓани и ранливите заедници во време на оваа криза, истакна амбасадорката Брнз.
Претставничка на УНИЦЕФ, Патриција ди Џовани изјави дека додека земјата спроведува критични јавно-здравствени мерки за да го забави ширењето на вирусот, не смееме да заборавиме да им посветиме посебно внимание на децата и семејствата кои веќе се соочени со секојдневни предизвици поради сиромаштија, исклученост и негативни искуства.
-Пандемијата претставува екстремен предизвик, кој уште повеќе ги зголемува секојдневните проблеми. Горди сме што соработуваме со многу партнери кои неуморно работат за да им го олеснат животот на сите и за да ја пребродиме оваа криза заедно, особено насочувајќи се кон најранливите во нашата заедница, истакна Патриција ди Џовани. бк/дма/
