Велес, 1 април 2020 (МИА) – Соочени со големи предизвици од ситуацијата во која се наоѓаме со коронавирусот, ДПТУ Жито Дооел Велес донесе одлука активно да се вклучи и да придонесе за дополнителна стабилност на државниот буџет со предвремено плаќање на месечните аконтации на данок на добивка за 2020 година во висина од 10.559.513 денари, информираат од „Жито маркети“ Велес.
Како што потенцира Јованче Ѓошевски управител на ДПТУ Дооел Жито Велес, на овој начин тие сакаат да дадат конкретна поддршка во насока на зголемување на капацитетите на државата за поуспешно и поефикасно справување со ситуацијата и заштита на здравјето на сите граѓани.
– Во овие тешки времиња потребно е да покажеме единство и солидарност повеќе од било кога, да се сплотиме и да се потпреме едни на други за да можеме што побрзо да се опоравиме и да се вратиме во нормала. Како компанија остануваме посветени на почитување на препораките и мерките на соодветните институции, бидејќи јавното здравје е општествена одговорност и од сите нас зависи, истакна Ѓошевски. ад/вј/
