Скопје, 17 март 2020 (МИА) – Министерот за здравство Венко Филипче на вечерашната прес-конференција соопшти дека попладнево се дијагностирицирани пет нови случаи со корона вирус, од кои четворица се здравствени работници од Дебар.
– Денеска имаме дијагностицирани пет нови случаи, од кои четири се здравствени работници од Дебар. Со ова, вкупната бројка на заболени во нашата земја изнесува 31. Од петте новозаболени освен четирите здравствени работници од Дебар, позитивен е тестот на сопругата на веќе дијагностицираниот пациент којшто тест го потврдивме од болницата „Жан Митрев“ и таа ќе биде хоспитализирана на Клиниката за инфективни болести, рече Филипче.
Министерот потенцира дека четворицата здравствени работници се од приватна здравствена установа од Дебар.
– Дел се само носители позитивни, веројатно дека ќе ја развијат болеста и беа скринирани како резултат на поширокиот скриниг што започна да се прави денеска во овој регион, појасни Филипче.
Тој најави дека од утре во болницата во Дебар, ќе присуствуваат и двајца доктори од Клиниката за пулмологија за да го надополнат капацитетот и да помогнат на останатите здравствени работници, епидемиологот и тројцата инфектолози, кои се веќе таму, во однос на скринингот, во однос на третманот, во однос на домашните визите на пациентите кои се лекуваат во Дебар.
– Целосно сме свесни дека здравствените работници се најескпонирани и за време на работата и надвор од здравствените установи, но ние мора да правиме се за да ги заштитиме тие луѓе заради тоа што во овие услови, како и во сите други тоа е многу потребно мора да обезбедиме одржлив и стабилен здравствен систем за сите. Нема да има оправдување за граѓаните кои нема да се придржуваат на мерките што се донесени како одлуки на Владата. Мора да биде нивото на свест за почитување на овие луѓе исклучително високо заради тоа што од тоа зависи јавното здравје битно за сите нас, исклучително битно за здравствените работници заради тоа што тие требаат сега како што требале порано, како што ќе требаат и понатаму кога овие моменти ќе бидат далечно минато. Тие здравствени работници имаат семејства, тие се грижат за нив, макотрпно и пожртвувано работат, се жртвувале во текот на животот, се едуцирале за да помагаат на нашите сограѓани, истакна Филипче.
Уште еднаш тој упати апел порака до здравствени работници дека трудот и напорот и улогата која што се дава во овој момент е непроценлива, а до граѓаните да се придржуваат до мерките.
– Затоа мора да водиме грижа за сите нас, а за граѓаните уште еднаш ја повторувам пораката – останете дома и најстрого придржувајте се до мерките за заштита и превенција, истакна Филипче. ев/сп/
