Струмица, 12 март 2020 (МИА) – Општина Струмица ќе ги решава само итните и неодложни барања на граѓаните, кои имаат потреба од документи, достава на барања, решенија за платен данок и други списи кои ги издава општинската администрација, соопшти денес градоначалникот Коста Јаневски.
Оваа мерка е согласно препораките на Владата на Република Северна Македонија, а по предлог од Министерството за здравство кои се однесуваат за превентива и заштита од вирусот Ковид 19.
Во соопштението од градоначалникот се препорачува на граѓаните, за секој проблем кој го имаат, а за кој е надлежна општина Струмица, да ги користат контактите по електронски пат и тоа преку веб страницата на Општина Струмица- www.strumica.gov.mk. На страницата се објавени телефонски броеви на сите служби, како и електронска пошта, со цел побрза комуникација, а во исто време и почитување на препораките од страна на Владата.рт/са/
