Шеснаесетгодишно девојче од Скопје ги пријавило своите родители во полиција, наведувајќи дека било жртва на физичко и психичко насилство во семејниот дом.
Како што информираат од Министерството за внатрешни работи, вчера во 09:30 часот, во Полициската станица Кисела Вода, полициски службеници од СВР Скопје извршиле службен разговор со А.Н. (53) и В.Н. (54), двајцата од Скопје.
Полициското постапување следувало по претходна пријава од нивната 16-годишна ќерка, која навела дека нејзиниот татко физички ја нападнал во семејниот дом, додека нејзината мајка подолг временски период психички ја вознемирувала.
Од МВР засега не соопштуваат дополнителни детали за околностите во кои се случил пријавениот физички напад, ниту за времетраењето и природата на пријавеното психичко вознемирување.
Надлежните институции продолжуваат со постапување за утврдување на сите околности поврзани со пријавата.
„По целосно документирање на случајот ќе следува соодветен поднесок“, соопштија од МВР.
