Стравот за сопствената безбедност и недовербата во институциите обесхрабруваат многу жени кои претрпеле семејно насилство да истраат во постапките што ги започнале. На ова предупреди граѓанската активистка Анастасија Павловска во емисијата „Ноќно студио“ на 4ТВ.
Според Павловска, жените што ќе се решат да пријават насилство се соочуваат со долги и исцрпувачки процедури. Додека траат постапките, вели таа, насилниците често продолжуваат слободно да се движат, а дел од жртвите повторно се соочуваат со закани.
„Голем дел имаат пријавувано, но потоа голем дел се откажале од самите постапки, бидејќи ја виделе целата институционална голгота низ која треба да поминат. Тоа ги обесхрабрува“, изјави Павловска.
Таа оцени дека последните случаи на фемицид укажуваат на сериозни пропусти во заштитата на жртвите. Како еден од проблемите ја посочи недоволната координација меѓу полицијата, центрите за социјална работа и обвинителството.
„Не зборуваме за политика, не зборуваме за тендери, не зборуваме за профити, зборуваме за човечки животи“, нагласи Павловска.
Активистката порача дека заштитата од семејно насилство е прашање на основните човекови права и дека државата има одговорност да им обезбеди безбедност на жртвите.
