Вработените во ветеринарно-здравствениот сектор денеска ќе излезат на мирен протест во Скопје, незадоволни од состојбите во секторот, недоволното финансирање и застојот во спроведувањето на превентивните мерки за заштита на здравјето на животните. Тие предупредуваат дека проблемите со кои се соочуваат не се однесуваат само на ветеринарната професија, туку можат да имаат пошироки последици врз сточарството, безбедноста на храната и јавното здравје.
Протестот ќе започне во 13 часот пред зградата на Агенцијата за храна и ветеринарство (АХВ), по што во 14 часот ветеринарите ќе го продолжат собирот пред Владата, каде што ќе побараат итна институционална реакција и конкретни решенија за надминување на проблемите.
Иницијативата за протестот потекнува од докторите по ветеринарна медицина кои работат во ветеринарните амбуланти и клиники и се директно вклучени во спроведувањето на превентивните мерки на терен. Нивното незадоволство доби поддршка и од Ветеринарната комора на Македонија, која посочува дека состојбата во секторот бара итно внимание од надлежните институции.
Според ветеринарите, еден од најсериозните проблеми е недостигот од буџетски средства наменети за здравствена заштита на животните, особено во последните две години. Тие сметаат дека недоволното финансирање директно се одразува врз можноста за навремено и непречено спроведување на мерките што имаат клучно значење за спречување на појавата и ширењето на заразни болести кај животните.
Дополнително, ветеринарните доктори изразуваат незадоволство и од, како што оценуваат, несоодветниот третман што професијата го има од страна на институциите. Тие бараат да се препознае значењето на ветеринарната служба како важен дел од системот за заштита на здравјето на животните, производството на храна и јавното здравје.
Од Ветеринарната комора предупредуваат дека секое одложување на превентивните активности може да предизвика сериозни проблеми, бидејќи навременото откривање на болестите е еден од основните предуслови за нивно успешно контролирање и сузбивање.
„Кога превентивните мерки доцнат, се отежнува навременото откривање и сузбивање на болестите кај животните. Тоа има последици за сточарите и за прометот со животни, а создава и ризици за безбедноста на храната и јавното здравје“, се наведува во соопштението на Комората.
Ветеринарите посочуваат дека последиците од ваквата состојба можат да бидат особено сериозни за сточарите, кои зависат од редовното спроведување на здравствените контроли и превентивните програми. Застојот во овие активности може да го отежне прометот со животни и да создаде дополнителна неизвесност во сточарското производство.
Од Комората нагласуваат дека проблемите не се нови и дека во изминатиот период повеќепати се обидувале да ги решат преку институционален дијалог. Преку официјални средби, писмени дописи и други форми на комуникација, надлежните институции биле континуирано информирани за состојбата и за потребата од обезбедување соодветни финансиски средства и подобри услови за работа.
Сепак, според нив, досегашните активности не довеле до решение што би овозможило стабилно функционирање на ветеринарно-здравствениот систем, поради што докторите по ветеринарна медицина одлучиле своето незадоволство да го изразат преку јавен протест.
Главните барања се насочени кон итно обезбедување услови за продолжување на работата на терен, редовно финансирање на превентивните програми и воспоставување долгорочни системски решенија што ќе овозможат непречена заштита на здравјето на животните.
Од Ветеринарната комора најавуваат дека сите барања што ќе бидат изнесени за време на протестот официјално ќе им бидат доставени на надлежните институции, од кои очекуваат конкретен одговор и преземање мерки.
Ветеринарите порачуваат дека нивната цел не е само подобрување на условите за работа, туку и обезбедување функционален систем за превенција и контрола на болестите кај животните, кој е од суштинско значење за сточарството, безбедноста на храната и здравјето на граѓаните.
