Околу 70.000 полицајци и жандарми ќе бидат мобилизирани утре во Франција за време на новите протести поради трошоците за живот и за реформите во образованието, изјави францускиот министер за внатрешни работи Лоран Нуњез, додавајќи дека ова ќе бидат итни безбедносни мерки поради високиот ризик од нарушување на јавниот ред и мир.
Безбедносната рамка, спроведена минатата сабота за заштита на продавниците и трговските центри, како одговор на бројните повици за грабеж што кружеа на социјалните мрежи, ќе биде одржувана и зајакната утре, изјави Нуњез за новинарите синоќа, објави парискиот весник „Монд“.
Според него, собирите ќе бидат дозволени, но „не во градските центри, каде што постои ризик од нарушување на јавниот ред и мир“, бидејќи „намерата и желбата за предизвикување штета“ сè уште се присутни.
„Нема да толерираме никакви немири“, предупреди министерот и додаде дека протестите ќе бидат пренасочени кон периферните области на големите градови.
Нуњез рече дека од организаторите се бара да обезбедат „полициска служба способна да се справи со евентуални нарушувања“ и, пред сè, да обезбедат собирите да се одвиваат во целосен ред.
Во меѓувреме, на социјалните мрежи се забележани бројни покани за собири пред Ноќта на вештерките, празник што се слави вечерта на 31 октомври.
Повиците, кои се појавуваат во многу градови низ Франција, доаѓаат од ултралевичарски кругови – радикализирани екстремно левичарски групи – како и од одредени радикализирани фракции на движењето „Жолти елеци“, рече Нуњез.
Тој додаде дека тие биле придружени со „пораки што повикуваат на револуција и востание и многу јасно охрабруваат предизвикување сериозни нарушувања“.
„Ваквите собири ќе бидат забранети од страна на полициските префектури“, рече Нуњез и предупреди дека Ноќта на вештерките нема да се смета за „легитимна причина да се скрие лицето на јавни места со цел да се извршат дела што го нарушуваат јавниот ред и мир“.
