Британската рок и бритпоп група Oasis најави нова светска турнеја во 2027 година, со планирани концерти во Велика Британија, Европа и САД, откако нивната изненадувачка турнеја за враќање беше распродадена минатата година.
Браќата Лијам и Ноел Галагер следната година ќе одржат 38 концерти. Ќе настапат 11 пати во родниот Манчестер, потоа и во Париз, Амстердам, Бостон, Лас Вегас и други градови. Турнејата почнува во Глазгов во мај 2027 година, а завршува со четири концерти во септември во Кнебворт, северно од Лондон, точно 30 години по легендарните настапи на дуото во тој мал град.
Авторите на хитовите од ерата на бритпоп, како што се „Wonderwall“, „Don’t Look Back in Anger“ и „Supersonic“, со недели го најавуваат продолжувањето на нивната турнеја за враќање. Синоќа, тие ја објавија веста на социјалните мрежи со пораката: „Нека почне прославата!“
„По период на размислување, ’најштетната поп-културна сила во поновата британска историја‘ ја прогласи својата подготвеност за акција и се врати да го подигне духот на луѓето“, напиша бендот. „Ќе биде глетка за паметење“, ветија тие.
Обожавателите, велат тие, ќе треба да се регистрираат преку специјален линк за да добијат можност да купат билети кога ќе бидат пуштени во продажба помеѓу 25 и 27 септември.
Оние кои успешно ќе аплицираат ќе добијат код за пристап до продажбата, сето тоа со цел да се намали времето на чекање во редови и да се потисне препродажбата на билети по превисоки цени, објавија тие во соопштение за медиумите.
Браќата Галагер во август 2024 година објавија дека ја завршиле својата 15-годишна караница и дека се обединуваат за светска турнеја, што предизвика вистинска потера со билети. Повеќе од два милиони луѓе присуствуваа на 41 концерт одржан низ Европа, Азија, Австралија и Јужна Америка, кои генерираа заработка од околу 350 милиони евра.
Некои обожаватели го критикуваа вртоглавото зголемување на цените на билетите на пазарот за препродажба, што доведе до истрага од страна на британските власти.
