Во руски напад со балистички ракети врз железнички објекти во Киев, вклучувајќи го и железничкото депо, загинаа седум лица, меѓу кои шест вработени во Украинските железници, додека друг работник е повреден и хоспитализиран, соопшти денес Олександр Перцовски, претседател на одборот на „Укрзализниця“.
Во текот на ноќта, руските сили ги таргетираа железничките објекти во украинската престолнина со балистички ракети, рече Перцовски, според украинскиот јавен сервис „Суспилне“.
За време на воздушниот напад во Киев се слушнале експлозии, а руските сили го нападнале градот со ударни беспилотни летала и балистички ракети. Украинските воздухопловни сили претходно соопштија дека детектирале брзо движечка воздушна цел што се упатувала кон Киев, а минута подоцна војската предупреди за „неколку цели кон главниот град“.
