Петте национални телевизии здружени во Македонската медиумска асоцијација (ММА) и јавниот сервис МРТ упатија сериозни обвинувања до Агенцијата за аудио и аудиовизуелни медиумски услуги (АВМУ) за начинот на кој се третираат спортските канали „Arena M1“, „Arena M2“ и „Arena M3 Premium“. АВМУ, пак, ги отфрли обвинувањата како неточни и неосновани.
Од ММА и МРТ тврдат дека располагаат со материјални докази оти каналите подолг период функционираат без домашна дозвола, иако, според нив, продукцијата, новинарите, коментаторите и гостите се во Скопје, студиските емисии се произведуваат во земјава, а програмата се емитува на македонски јазик.
Тие посочуваат и дека каналите не се заведени во евиденцијата на српскиот регулатор РЕМ, додека во операторските евиденции одобрени од АВМУ се третираат како странски програмски сервиси.
ММА и МРТ бараат надлежните институции да испитаат дали на овој начин била заобиколена обврската за поседување дозвола, дали е предизвикана штета на буџетот и дали постои одговорност кај сопствениците, одговорните лица и службеници во АВМУ. Дополнително бараат да се испита и евентуално неовластено користење премиум спортски телевизиски права.
Најавија дека ќе поднесат соодветни поднесоци до Јавното обвинителство и МВР, а предупредија дека нема да дозволат сличен модел да биде применет и за најавениот „Еуроњуз Македонија“.
На обвинувањата реагираше АВМУ, од каде категорично тврдат дека постапуваат согласно законските надлежности и врз основа на документација и информации добиени од домашни институции и релевантни странски субјекти.
Според Агенцијата, „Arena M1“, „Arena M2“ и „Arena M3 Premium“ се третираат како странски програмски сервиси кои се реемитуваат во земјава бидејќи нивниот изворен сигнал не се емитува од територијата на Македонија.
АВМУ ги отфрла и тврдењата дека овозможила заобиколување на законските обврски и ги повика ММА и МРТ, доколку располагаат со докази за незаконско постапување, да ги достават до надлежните институции.
