Летните горештини засега немаат намера да ја напуштат земјава. Високите температури ќе продолжат и во последната недела од август, а според актуелните долгорочни прогнози, невообичаено топлото време би можело да продолжи и во првите денови од септември.
Во следните денови се очекуваат максимални дневни температури кои на одредени места ќе се движат меѓу 36 и 39 Целзиусови степени. Особено топло се прогнозира околу 28 август, кога максималната температура би можела да достигне до 39 степени.
Високите температури ќе се задржат и до самиот крај на месецот. Според сегашните проекции, на 31 август максималните вредности би се движеле околу 35 степени, што значи дека август ќе заврши со вистински летни услови.
Ниту почетокот на метеоролошката есен засега не носи позначително освежување. За 1 септември долгорочните модели покажуваат температура од околу 37 степени, додека на 2 септември се очекуваат околу 35 степени.
Температурите над 30 степени би можеле да продолжат и во наредните денови. Кон крајот на првата недела од септември се очекува постепено намалување, но и понатаму ќе биде релативно топло за овој период од годината.
Првото позабележително намалување на температурите се наѕира околу 6 септември, кога дневните максимални вредности би се движеле околу 28 до 29 степени.
Според долгорочните проекции, претежно сончевото и топло време би можело да продолжи и кон средината на септември, без нагло преминување кон типично есенски временски услови.
Поголема промена во моментов се наѕира дури во последната недела од септември. Тогаш максималните дневни температури би можеле да се спуштат во интервал од околу 20 до 25 степени, а би се зголемиле и шансите за облачност и врнежи.
Доколку ваквите прогнози се остварат, по исклучително топлиот финиш на август, летните температури ќе продолжат и на почетокот од метеоролошката есен.
Сепак, прогнозите за период подолг од една до две недели имаат значително поголема неизвесност, па очекуваните температури и временски услови може да се променат со приближувањето на датумите.
