Граѓани од повеќе делови на Скопје денеска се жалат на мирис на чад и дим во воздухот, а истовремено дел од мерните станици регистрираат зголемено загадување.
Според податоците прикажани на платформата IQAir, мерната точка кај NOVA International School Skopje 2 во 13 часот регистрирала индекс на квалитет на воздухот од 155 US AQI, вредност која е означена во категоријата „нездрав“ воздух.
Како главен загадувач се наведуваат ситните ПМ2.5 честички. На оваа мерна точка нивната концентрација изнесувала 61 микрограм на кубен метар воздух.
Високите вредности доаѓаат во период кога скопјани се жалат дека во воздухот се чувствува мирис на чад. На приказот на IQAir истовремено стои и предупредување за пожар во близина на Прешево, Србија.
Сепак, во моментов нема официјална потврда дека пожарот во регионот е директната причина за чадот или зголемените концентрации на ПМ2.5 честички во Скопје. За утврдување на изворот потребни се дополнителни податоци за пожарите, ветерот и движењето на воздушните маси.
