На ЈЗУ Универзитетска клиника за хируршки болести „Св. Наум Охридски“ – Скопје денеска беше пуштено во употреба целосно реконструираното Одделение за трауматологија, во чија обнова се инвестирани речиси 230.000 евра.
Како што истакна директорот на ЈЗУ Универзитетска клиника за хируршки болести „Св. Наум Охридски“, Небојша Настов, капацитетот на одделот изнесува 26 кревети, каде што девет хирурзи трауматолози годишно изведуваат речиси 1.100 оперативни интервенции. Настов истакна дека со реконструкцијата целосно се обновени инсталациите, системот за греење и подовите, а поставени се и сензорски врати за намалување на интрахоспиталните инфекции.
– Направена е реконструкција на комплетно целиот оддел со комплетно нова електрична инсталација, водоводна, доводна, одводна канализациска мрежа, како и промена на системот за парно греење, промена на комплетните подови и монтажа на таканаречени автоматски сензорски врати, кои се во склоп на препораките на Светската здравствена организација за намалување на трансмисијата, односно преносот на интрахоспиталните инфекции, што подразбира дека нема кваки на самите врати, туку само со доближување на раката сензорите се отвораат или се затвораат – посочи Настов.
Инвестицијата, појасни, изнесува околу 200.000 евра само за градежните активности, со дополнителна инвестиција од 30.000 евра којашто е за комплетно новиот мебел на одделот, обезбедени од спонзорства од општествено одговорни компании. – Оние 200.000 евра се од буџетот на самата болница, односно од нашиот буџет – појасни Настов.
Прашан колку пациенти биле згрижени и на колку им била укажана помош по вчерашното невреме во Скопје, Настов посочи дека се јавиле за преглед вкупно 22 пациенти.
– Од 22 пациенти, двајца се примени на болничко лекување, останатите се третирани поликлинички, со полесни повреди. Од оние двајца, еден пациент е веќе опериран во текот на ноќните часови со скршеница во предел на шаката. Има уште еден пациент којшто е странски државјанин, турист кој е повреден при пад на дрво, кој е со повреди во пределот на карлицата, но не изискуваше оперативен третман, што значи дека се планира за конзервативен, односно неоперативен третман – посочи Настов.
На денешниот настан присутни беа и министерот за здравство Сашо Клековски, како и претседателот на Владата Христијан Мицкоски. Според Клековски, Клиниката за хируршки болести „Св. Наум Охридски” е прва инстанца за трауматски повреди во главниот град. – Стара градска е позната како прва инстанца за трауматски повреди во градот и вообичаено сите коишто имаат траума стигнуваат тука. Можам да кажам дека директорот е амбициозен и веќе работи на планот за целосна реконструкција и на ургентниот дел и на оперативниот блок. Се надевам дека со тоа во догледно време ќе се комплетира реконструкцијата на овој капацитет, кој е важен хируршки центар во градот – рече Клековски.
Во врска со синоќешното невреме, тој додаде дека во Клиничкиот центар „Мајка Тереза“ има згрижено 11 повредени, од кои тројца се со посериозни скршеници.
– Ги следиме штетите на здравствените установи, има паднати дрвја во Клиничкиот центар „Мајка Тереза“, без повредени, во Психијатриската болница во Бардовци исто така без повредени, но таму имаше и неколкучасовен прекин на струјата кој е обновен, а има и значителни штети на кровната конструкција во Клиничката болница во Штип. Има штети и на кровната конструкција на ГОБ „8 Септември“. Клиничката болница и ГОБ „8 Септември“ се осигурени, така што работат и осигурителните куќи на проценка на штетите, по што веднаш ќе се реагира за да се обезбеди непречено работење на двете болници – посочи Клековски
Во врска со епидемијата во Гостивар, министерот посочи дека е во смирувачки тренд. – Од вчерашната информација дека имавме околу 290 пациенти со прв контакт со доктор, денеска се 190 пациенти. Имаме натамошно намалување и тоа е веќе значително намалување од пикот што беше во саботата, кога имаше за еден ден околу 600 пациенти. Ние продолжуваме со поддршка на сите епидемиолошки активности неопходни за да се утврди дијагностиката и настаните. Значи, ова не е прв случај, сакаме да биде последен ваков случај и да покажеме дека можеме да функционираме соодветно – рече Клековски.
Премиерот Христијан Мицкоски упати честитки до раководството и вработените, нагласувајќи ја определбата на Владата за континуирано вложување во здравствениот сектор.
– Од 1965-та година нема шајка заковано тука, така што полека, но сигурно почнуваме да ги реализираме приоритетите. За жал, не можеме сè она што со децении било уништувано да го исправиме одеднаш, но еден по еден приоритет ги решаваме. Така што и во периодот што следи, здравството ќе биде еден од врвните приоритети во работата на Владата. Ќе продолжиме да инвестираме, веќе буџетот надминува една милијарда евра годишно коишто ќе се инвестираат во здравството – истакна Мицкоски.
