Рестораните ширум Европската Унија од 12 август повеќе нема да смеат да им послужуваат на гостите кои консумираат храна во објектот еднократни кесички со сосови како кечап, мајонез или соја сос. Новите правила се дел од европската Регулатива за амбалажа и отпад од амбалажа (ППВР), чија цел е намалување на количеството пластичен отпад.
Регулативата стапи во сила во февруари 2025 година, а нејзината примена започнува ова лето во сите земји-членки на ЕУ. Наместо еднократни пакувања, рестораните ќе мора да користат дозер за повеќекратна употреба, шишиња или други системи што не создаваат дополнителен отпад. Европската комисија наведува дека амбалажата учествува со околу 40 проценти во вкупната потрошувачка на пластика во Европската Унија. Според официјалните податоци, просечен жител на ЕУ во текот на 2022 година создал 186,5 килограми отпад од амбалажа.
Целта на Брисел е да го намали количеството отпад од амбалажа по жител за 15 проценти во периодот меѓу 2026 и 2040 година. Новите правила се однесуваат на различни видови еднократна пластична амбалажа, вклучително и индивидуалните пакувања со сосови кои често се користат во рестораните и синџирите за брза храна.
Забраната нема да се однесува на храна за носење, ниту на производите што се продаваат во трговските објекти. Тоа значи дека еднократните кесички со сосови и натаму ќе бидат достапни како дел од доставата на храна, како и на полиците во супермаркетите. Новите правила ги опфаќаат и здравствените установи.
Од Европската комисија порачуваат дека алтернативните решенија веќе се широко достапни, а воедно се објавени и насоки со цел угостителите полесно да се приспособат на новите барања. Ограничувањата за кесичките со сосови претставуваат само дел од поширокиот план за намалување на отпадот од амбалажа. Од 2030 година се очекува постепено укинување и на други видови еднократни пакувања, вклучувајќи ги и малите шишенца со шампон и сапун кои често се користат во хотелите.
Европската комисија планира во 2032 година да спроведе процена на ефектите од новите мерки.Од Брисел истакнуваат дека досегашните политики веќе дале видливи резултати, наведувајќи дека количеството пластичен отпад на европските плажи е намалено за околу 30 проценти.
