Да се биде гласноговорник на најголемата и најорганизираната политичка партија во Македонија претставува огромна чест, но и сериозна одговорност. Ова го истакна портпаролот на ВМРО-ДПМНЕ, Валентин Манасиевски, во гостувањето во емисијата „Ноќно студио“ на „4ТВ“, каде зборуваше за својот политички пат, приватниот живот и мотивите што го насочиле кон политиката уште од најрана возраст.
Иако има само 28 години, Манасиевски веќе зад себе има долгогодишен политички ангажман, но и стабилен семеен живот како сопруг и татко.
„Татко сум на прекрасна ќерка, која ми дава мотив повеќе да работам, да се вклучам во политиката и да направам нешто подобро за секој еден човек во нашето општество“, изјави Манасиевски.
Тој откри дека интересот за политиката кај него се појавил уште во тинејџерските денови, а значајно влијание имале и семејните корени.
„Уште од младите години ме влечеше политиката. Моите родители, баба и дедо, имаат традиционални ‘вмровски’ корени. Сметам дека тоа одигра голема улога во моето насочување“, рече тој.
Неговиот политички пат започнал на 15-16 годишна возраст, кога се приклучил на Унијата на млади сили (УМС) на ВМРО-ДПМНЕ. Во текот на годините поминал низ повеќе партиски позиции, бил член на Извршниот комитет на УМС, а подоцна и организационен секретар на младината.
Денес, како портпарол на партијата, Манасиевски вели дека со задоволство ги претставува политиките во кои искрено верува и кои, според него, се во интерес на иднината на државата.
„За мене претставува чест да ги бранам и презентирам политиките во кои верувам и за кои сметам дека можат да донесат подобра иднина за Македонија“, порача Манасиевски.
