Епидемијата на ебола во Демократска Република Конго уби најмалку 118 лица, а зарази повеќе од 390, соопштија локалните власти. Портпарол на конгоанската влада потврди дека епидемијата се шири во нови области.
Во соседна Уганда, според податоците од американските Центри за контрола и превенција на болести (CDC), има два потврдени случаи и еден смртен случај. Светската здравствена организација (СЗО) ја прогласи оваа епидемија, предизвикана од сојот Бундибугјо на вирусот ебола, за криза на јавното здравје од меѓународно значење, пишува Би-Би-Си .
Како што се шири смртоносната епидемија, конгоанската влада се обидува да ја смири јавноста, нагласувајќи дека нејзините тимови работат напорно на следење и истрага на сомнителните случаи и дека нема причина за паника. Сепак, загриженоста расте бидејќи се потврдени нови случаи во области како што се Њакунд во покраината Итури, Бутемба во Северен Киву и градот Гома.
Меѓу заразените е и американски лекар кој работи во ДР Конго, што е потврдено од Центарот за контрола и превенција на болести (CDC) и медицинската мисионерска организација за која работел. Тој ќе биде префрлен во Германија на лекување, објави CBS News, американскиот партнер на BBC.
Американски граѓани погодени од епидемијата
Иако ЦДЦ не го објави идентитетот на заразеното лице, медицинската мисионерска организација „Серж“ потврди дека нивниот лекар, Питер Стафорд, е позитивен на тестот за ебола. Неговата сопруга, д-р Ребека Стафорд, и уште еден колега биле изложени на вирусот додека лекувале пациенти, но немаат симптоми и се во карантин, соопшти организацијата.
Според извори на CBS News, најмалку шест американски државјани биле изложени на вирусот ебола во Демократска Република Конго. ЦДЦ соопшти дека ја поддржува „безбедната евакуација на малиот број Американци кои биле директно погодени“, но не прецизираше колкумина.
Здравствениот портал STAT, повикувајќи се на свои извори, објавува дека американската влада организира транспорт на мала група Американци на безбедна локација за карантин, веројатно во американска воена база во Германија, но оваа информација не е официјално потврдена. На прес-конференцијата во недела, CDC одби директно да одговори на прашања за засегнатите американски граѓани.
Мерките на САД за спречување на ширењето на болеста
Американската агенција за јавно здравје во понеделник соопшти дека ризикот за САД е релативно низок, но најави низа мерки за спречување на влегувањето на болеста во земјата. Мерките вклучуваат скрининг на патниците што доаѓаат од погодените области и ограничување на влезот за секој што нема американски пасош, а бил во Уганда, ДР Конго или Јужен Судан во последните 21 ден.
ЦДЦ објави соработка со авиокомпаниите за следење на контактите на патниците, како и зголемување на капацитетот за тестирање и подготвеноста на болниците. Соединетите Американски Држави, исто така, издадоа највисоко ниво на препорака 4, советувајќи да не се патува во ДРК.
