Вкупно 344 деца починале од почетокот на епидемијата на мали сипаници во Бангладеш во март оваа година, а бројот на случаи продолжува да расте, соопштија здравствените службеници во земјата, цитирани од ДПА.
Од 344 деца кои починале од 15 март, кај 65 е потврдена инфекција со мали сипаници, додека останатите имале симптоми.
Генералниот директорат за медицински услуги на владата соопшти дека 11 деца починале за само 24 часа до недела наутро. Во истиот 24-часовен период, кај 282 деца е дијагностицирана болеста, а 1.278 биле примени во болница со симптоми на мали сипаници.
Вкупно 49.159 деца покажале симптоми на болеста од 15 март. Од нив, 34.909 се хоспитализирани.
Повеќе од 30.000 од пациентите веќе се отпуштени.
На почетокот на април, владата на Бангладеш, со поддршка од УНИЦЕФ, Светската здравствена организација (СЗО) и Глобалната алијанса за вакцини и имунизации (ГАВИ), започна итна кампања за вакцинација против мали сипаници и рубеола.
Според УНИЦЕФ, кампањата има за цел да обезбеди заштита на повеќе од 1,2 милиони деца на возраст од шест месеци до пет години во 18 од 64 административни региони на земјата.
Агенцијата на ОН соопшти дека итната кампања ги надополнува рутинските напори за имунизација и е дел од поширока стратегија за враќање на покриеноста со имунизација, зајакнување на здравствените системи и градење отпорност против идни епидемии.
