Германската авио компанија Луфтханза времено ќе ја укине линијата помеѓу Франкфурт и Скопје за месец јуни. Последниот лет е закажан за 31 мај, а обновувањето се очекува дури од 1 јули, но без потврден распоред.
Оваа одлука доаѓа откако последниот месец кај германскиот авиопревозник е обележан со штрајкови, гасење на подружницата CityLine и масовни откажувања на рутите низ мрежата.
Луфтханза ќе го одржи редовниот дневен сервис на линијата Франкфурт–Скопје до 16 мај, по што фреквенцијата се зголемува на девет до десет летови неделно до 31 мај. По тој датум, во јун нема закажани директни летови. Авиокомпанијата очекува да ги возобнови операциите од 1 јули, но ажурираниот возен ред сè уште не е финализиран.
Скопје останува во мрежата, но преку Виена
Луфтханза официјално потврди дека патниците за Скопје ќе бидат пренасочени преку Виена, каде Austrian Airlines, членка на Луфтханза групацијата, ќе ги преземе врските. Станува збор за дел од поширока консолидација: летовите Минхен–Бордо и Франкфурт–Бордо се обединуваат преку Минхен, а линиите до Глазгов и Херингсдорф се преусмеруваат преку Цирих.
Одлуката е дел од масовна реорганизација на мрежата. Само оваа недела, Луфтханза ги откажа 944 неделни летови во јуни, 258 во јули, 250 во август, 260 во септември и уште 258 во октомври. Авиокомпанијата во април беше погодена со затворање на подружницата CityLine, по што беа суспендирани бројни рути.
Германскиот превозник ја воведе линијата Франкфурт–Скопје во доцен април 2023 година. Во текот на претходната зима, компанијата веќе направи значителни резови, намалувајќи ги летовите од планирани десет неделно на само три неделни ротации во февруари и март. Консолидацијата се одвива во рамките на програмата „Matrix Next Level”, со цел централизација на операциите преку јазел-авиокомпаниите на групацијата: Swiss, Austrian Airlines, Brussels Airlines и ITA Airways.
