Известувачот за Европски парламент за Северна Македонија, Томас Вајц, изјави за Канал 5 дека интервјуто од кое неделава беа пренесени негови критички ставови е снимено пред повеќе од седум недели и не ја одразува актуелната состојба.
Тој посочи дека интервјуто било дадено за бугарската редакција на Euronews на почетокот на март, а не е јасно зошто било објавено дури сега.
„Интервјуто е од пред повеќе од седум недели и ја покажува проценката за моментумот на почетокот на март“, изјавил Вајц.
Во интервјуто што беше објавено во неделата, а кое го пренесоа македонските медиуми, Вајц оценил дека земјата залудно потрошила една година и дека нема напредок во реформите неопходни за членство во Европска унија.
Сега, тој вели дека е изненаден од тајмингот на објавувањето.
„Мислам дека не е многу професионално, ни беше кажано поинаку. Без малку сум изненаден што е објавено пред неколку дена. Но, за жал изгледа дека има некаква агенда зад тоа“, рече Вајц за Канал 5.
Според него, Северна Македонија во меѓувреме бележи напредок во реформскиот процес и има дополнително време до јуни да ги исполни обврските од реформската агенда.
Телевизијата најави дека целосното интервју со Вајц ќе биде емитувано утре.
