Општина Центар на 27 април, во понеделник, со почеток од 17 часот, кај спомен-клупата на Горан Стефановски, ќе одржи настан посветен на одбележувањето на роденденот на еден од најзначајните македонски драмски автори и културни дејци.
„Ги поканувам центарци и сите почитувачи на книжевноста и делото на Горан Стефановски да ни се придружат и заедно да го одбележиме неговото творештво, неговиот дух и неговото присуство во културниот живот, преку уметност, музика, сеќавања и пријателски разговори”, порача градоначалникот на Општина Центар, Горан Герасимовски.
Домаќин на настанот ќе биде неговиот син, Игор Стефановски, кој ќе ги потсети присутните на родендените што ги славеле заедно, како и на неговиот живот, хумор, идеи и оставштина.
Во рамки на настанот, хорот „Мирче Ацев” ќе изведе неколку од омилените песни на Горан Стефановски, а настап ќе има и младата џез формација „Трицикл”.
Програмата ќе биде збогатена со монолози од неговите дела, интерпретирани од актери, како и со ликовна изложба со портрети од Горан, насликани од уметникот Ненад Рафајловски. Музичката атмосфера ќе ја заокружи DJ Шурбе со свој DJ сет.
Општина Центар, години наназад, реализира настани и уредува уметнички катчиња, посветени на животот и делото на славниот дебармаалец.
