Државите од регионот се соочуваат со нов бран лажни дојави за поставени експлозивни направи, што безбедносните експерти ги оценуваат како дел од координирана хибридна активност насочена кон дестабилизација и ширење паника меѓу граѓаните.
Во текот на изминатите часови, голем број јавни институции, училишта, судови и трговски центри низ Хрватска, Босна и Херцеговина и Црна Гора примија заканувачки пораки за поставени бомби. Дојавите предизвикаа евакуација на повеќе објекти во Загреб и други поголеми градови, парализирајќи го секојдневниот живот на илјадници граѓани. Посебен фокус беше ставен и на Сараево и други клучни центри, каде полициските екипи извршија детални контрадиверзиони прегледи. Институциите во Подгорица беа мета исто така на серија закани, кои принудија итно прекинување на работата на државните органи.
Министерствата за внатрешни работи на трите држави соопштија дека се работи на откривање на изворите на овие пораки. Иако досега ниту една дојава не се покажа како вистинита, полицијата потсетува дека секоја закана се третира со максимална сериозност.
