САД ќе ги блокираат бродовите што „влегуваат или излегуваат“ од иранските пристаништа почнувајќи од денес во 16 часот по европско време, објави Доналд Трамп.
Американскиот претседател вчера објави дека американската морнарица ќе започне со процес на блокирање на „сите бродови“ што се обидуваат да влезат или излезат од Ормутскиот теснец.
Централната команда на САД соопшти дека блокадата ќе биде „спроведена непристрасно кон бродовите од сите нации“, но на бродовите што пловат меѓу неирански пристаништа сепак ќе им биде дозволено да минуваат низ теснецот, низ кој минува околу една петтина од светската нафта.
Иранска морнарица: Заканите на Трамп се смешни и апсурдни
Командантот на иранската морнарица ја коментираше заканата на Доналд Трамп да ги блокира бродовите што влегуваат или излегуваат од иранските пристаништа, објави иранската државна телевизија Прес ТВ.
Шахрам Ирани издаде соопштение преку државните медиуми во кое се вели дека морнарицата „ги следи сите движења на агресивната американска војска во регионот“.
„Заканите на американскиот претседател по понижувачкиот пораз на неговата армија во третата наметната војна, вклучително и поморска блокада на Иран, се многу смешни и апсурдни“, додаде тој.
