На 4.4.2026, во галеријата на НУЦК „Никола Јонков Вапцаров“ – Делчево, со почеток во 12:00ч. ќе биде отворена „Будна вода“- изложба на слики и ќе биде промовирана со промоција на збирката хаи[бун]накуа „Разбудена вода“ од Дијана Петкова. Изложбата ќе ја отвори Златко Начовски-директор на НУЦК „Никола Јонков Вапцаров“ – Делчево, а збирката ќе ја промовира Билјана Петровска-директорка на ЈЛБ „Илинден’’ во Делчево.
Циклусот „Будна вода“ опфаќа четириесет дела, но само дваесет слики работени во техниката акрилик на платно и комбинирана техника, но ќе бидат изложени само дваесет дела. Сликите се работени во периодот од 2022 – 2025 година.
„Дијана Петкова е мошне интересен феномен на современата македонска книжевна сцена. Вљубеничка во хибридните книжевни форми, инспирарани од традиционалните јапонски и модерните американски куси поетски форми, создава свои авторски форми, а во нејзината најнова експериментална збирка „Разбудена вода“ поместува дваесет патописни хаи[бун]накуа инспирарани од нејзините патувања на места каде што има вода и уште толку хаи[на]куа со превртено и огледално хаи[на]ку. И токму во оваа комбинација на нова и авторска книжевна форма хаи[бун]наку во комбинација со патописот и мотивот на екологијата се содржи најголемата иновативност и уникатност на ова дело.“…
…„Во најновата книга на Дијана Петкова, симболот на водата е многу моќен. Авторката пишува за свеста на водата, но и за свеста за водата“…
„Разбудена вода“, меѓу другото, претставува и книжевно дело со еколошка свест и порака, а тоа го прави ова дело општествено одговорно. Имено, фактот што водата е препознаена како важен природен ресурс, а истовремено и како важен книжевен симбол, го мапира ова книжевно дело меѓу ретките книжевни, ненаучни дела посветени на екологијата и инспирирани од неа. Во делото се читаат јасни пораки за важноста на водата како природен ресурс, меѓу кои и поракта за „подигнување на свеста кај луѓето за значењето на водата и за развивање одговорен однос кон неа“, вели Елена Пренџова во рецензијата за книгата.
Љубителите на уметноста ќе може да ја посетат изложбата до 15.4.2026.
Дијана Петкова е родена во Скопје. Дипломирала на Филолошкиот факултет во Скопје, на групата Македонски јазик со историја на книжевностите на југословенските народи.
Учела сликање кај академскиот сликар и ликовен педагог Тони Шулајковски.
Авторски потпис ставила на две самостојни изложби „Момент во денот“ и „Будна вода“, на три онлајн изложби на платформата Artsteps: “Life is poetry”, „Поврзи се“ и „Седум порти на лотосот“, а учествувала и на дваесетина групни изложби.
Организирала четириесет и осум самостојни изложби на академскиот сликар Тони Шулајковски, а истовремено го менаџира неговото творештво. Напишала предговори во каталозите за неговите изложби: „Друг свет“, „Под дејство на звукот“, „Пеш низ звукот“, „Воздишка за просторот“, „Интергалактички реакции“, хаику за каталогот на изложбата „Предградие на свеста“ и хаи[бун]наку за каталогот на изложбата „Повисоко од себеси“.
Во креативниот центар „Арс вивенди“, каде што работи како менторка во студиото за креативно пишување, организирала дваесет завршни изложби и промовирала шест книги: „Слободна вода“, „Тивките сили на духот“, „Мисли молкома“, „24/7“, „Месечино, диши! и „Дремката на облакот“, изработени од деца – членови во овој креативен центар.
Нејзината поезија е објавувана во списанијата „Современост“ „Стожер“, ТЕА модерна и хрватското списание „Ирис“, а застапена е во антологијата „Отчукување на срцето во македонската поезија“ од Светлана Христова-Јоциќ (2012), во зборникот „Надреалистички гугилипапули“ со поезија и кратки раскази (2016), „Самодиви“ – панорама на поезија пишувана од жени, од преродбата до денес приредена од Славе Ѓорго Димоски и Јулијана Величковска(2023)во повеќе е-збирки и во Зборниците на Поетски слем Македонија (2021, 2022,2023,2024).
Досега ги издала збирките поезија „Стефанија“ (1999), „Деца од свила“- поезија со детски цртежи (2011), „Нова реалност за просторот“ (2013) , „Честичка свесност“ – хаику и хаига (2014), „Мамо што има за јадење?“- хаику готвач за свесни мажи и жени (2016), „Енсо•Поврзување со целоста“ – хаику и хаига (2017) и „Поврзи се…“ – хаиги, со фотографии од убавините на Македонија изработени од Камелија Шојлевска (2018), „Растајнување на светлината“ – хаинаку, превртено хаинаку и хаинага (2019), „Момент во денот“ енсо•хаику дневник (2020), „Скротителка на змејови“ – хаи[бун]наку и „Разбудена вода“ – хаи[бун]наку/каталог .
Живее и работи во Скопје.
