Макпетрол јавно порача дека потегот на ОКТА не го решава суштинскиот проблем. Повод за реакцијата е одлуката на ОКТА од 13 март до крајот на месецот да одобри попуст од 2 денари по литар за дизел и бензини кон компаниите што набавуваат од неа, со можност тие тоа намалување да го пренесат и кон крајните потрошувачи.
Од Макпетрол велат дека таквото намалување е премало за состојбата на пазарот и дека не ја отстранува штетата што веќе настанала кај трговците на мало. Во нивната реакција се наведува дека добавувачот во изминатиот период продавал по цени повисоки од регулираните малопродажни цени, при што остварувал профити, додека бензинските станици работеле со загуба, но не ги затвориле продажните места. Компанијата додава и дека сè уште немала добиено официјално известување од добавувачот за објавеното намалување.
Судирот меѓу големопродажната и малопродажната логика станува уште повидлив ако се погледне што се случи на 10 март. Со одлука на Регулаторната комисија за енергетика, малопродажните цени на нафтените деривати беа зголемени во просек за 14,27 отсто, при што дизелот поскапе за 14,50 денари по литар, бензините за 5 денари, а екстра лесното масло за 12,50 денари. Тоа значи дека попустот што сега го нуди ОКТА покрива само мал дел од претходниот ценовен шок, особено кај дизелот.
