Здружението на граѓани „16-ти Март“ упати отворен повик до јавноста за учество во „Маршот на ангелите“, кој ќе се одржи оваа сабота, 21 февруари, со почеток во 15:05 часот.
Настанот е замислен како достоинствен и тивок собир посветен на сеќавањето на прерано изгубените млади животи, но и како силен апел за итна и вистинска правда, пренесе 4news.mk. Организаторите истакнуваат дека маршот има за цел да побара одговорност за секоја неправда и да ги потсети институциите дека правдата не смее да доцни.
„Овој марш е глас на семејствата, пријателите и целата заедница која не се помирува со молкот и нерешените прашања. Чекориме за да потсетиме дека изгубените животи нè обврзуваат на упорност“, се наведува во повикот на Здружението „16-ти Март“.
Граѓаните се повикани да се приклучат во што поголем број и со своето присуство да дадат поддршка на семејствата кои сè уште трагаат по вистината и правдата. Пораката на организаторите е маршот да помине достоинствено, тивко, но одлучно, со јасна порака дека борбата за правда продолжува сè до нејзиното целосно остварување.
