Епидемија на мали сипаници е регистрирана во северен Лондон, каде што се заразени повеќе од 60 деца, соопштија здравствените служби, повикувајќи на итна вакцинација. Веста денеска ја пренесоа британските медиуми. Според објавата на The Sunday Times, вирусот за кратко време се проширил во седум училишта и една градинка во северниот дел на градот, а дел од децата поради компликации биле задржани на болничко лекување. UK Health Security Agency (UKHSA) потврди 34 случаи на мали сипаници во општината Енфилд во периодот од 1 јануари до 9 февруари.
Од агенцијата предупредуваат дека без итна и масовна имунизација, заразата би можела да се прошири на меѓу 40.000 и 160.000 деца. На ситуацијата реагираше и World Health Organization, која претходно соопшти дека Велика Британија го изгубила статусот на земја во која сипаниците биле елиминирани, токму поради падот на опфатот со вакцинација. Здравствените власти дополнително нагласуваат дека Лондон има една од најниските стапки на вакцинација во државата, што го прави главниот град особено подложен на појава и ширење на епидемии од ваков тип.
