Европската комисија усвои мерки за забрана на уништување на непродадена облека, обувки и додатоци, со цел да се поттикне рециклирањето и да се намали штетното влијание врз животната средина.
Забраната ќе важи за големите компании од 19 јули оваа година, а за средните компании од 2030 година. Исто така, фирмите ќе мора да ги известуваат властите за непродадените производи што ги декларираат како отпад.
Се проценува дека секоја година во Европа се уништува од 4 до 9% од непродадената облека, што предизвикува околу 5,6 милиони тони емисии на CO₂ – речиси колку целата нето емисија на Шведска во 2021 година.
Регулативата е дел од пошироките мерки за одржливост на производите на пазарот на ЕУ, со фокус на циркуларна економија, рециклирање и енергетска ефикасност.
