Француската морнарица заплени 1,4 тони кокаин на Атлантикот, а проценетата улична вредност на таа количина дрога е 41 милион евра, соопшти денеска француската Атлантска поморска префектура.
Во соопштението се наведува дека кокаинот е запленет на 1 февруари на рибарски брод кој доаѓал од Јужна Америка, додека осомничените им се предадени на бразилските правосудни органи, пренесе „Фигаро“.
Се истакнува дека заплената е извршена на барање на Националниот директорат за царински разузнавачки работи и истраги и Канцеларијата на комесарот за борба против наркотици, по разузнавачки податоци кои биле прибрани во соработка со, меѓу другите, британските и американските полициски служби.
Француската морнарица во текот на 2025 година запленила 87,6 тони дрога ширум светот, што е зголемување од 81 отсто во однос на истиот период во 2024 година, вклучувајќи и 58 тони кокаин, што претставува рекордна заплена, наведува весникот.
