Експлозивна направа била фрлена врз семејната куќа на балканската музичка ѕвезда Здравко Чолиќ во елитната белградска населба Дедиње, објави српскиот портал Нова.рс.
Според информациите на агенцијата Танјуг, силната експлозија предизвикала значителна материјална штета на објектот, но за среќа, во инцидентот нема повредени лица.
На местото на настанот веднаш излегле полициски екипи, како и дежурен јавен обвинител од Вишото јавно обвинителство во Белград, кои вршат увид и собираат докази.
Првичните информации укажуваат дека најверојатно станува збор за рачна бомба, но точниот тип на експлозивната направа, како и мотивите за нападот, допрва ќе се утврдуваат во рамки на истрагата. Полицијата интензивно работи на идентификација на сторителот или сторителите на овој инцидент, кој предизвика силна вознемиреност во српската јавност.
