Лидерот на Демократската партија на Албанија, Сали Бериша, за време на редовниот понеделнички собир пред владата во Тирана, упати остри обвинувања кон владата, нарекувајќи ја „најсрамниот и најраспаднатиот режим во Европа и светот“. Бериша изјави дека владеењето на премиерот Еди Рама се темели на измама, пропаганда и лаги, обвинувајќи дека корупцијата е присутна во сите институции. „Каде и да го допрете режимот, тече кражба – кражба и само кражба на Албанците“, рече тој.
Обраќајќи се пред поддржувачите на собирот наречен „говорница“, лидерот на опозицијата истакна дека граѓаните се решени да ѝ ја дадат на актуелната власт „казната што ја заслужува“, обвинувајќи го Рама дека оди кон државен удар и го блокира функционирањето на правосудниот систем.
Бериша порача дека, според него, премиерот секојдневно ги понижува и провоцира граѓаните, а говорот го заврши со повик за отпор и промени, прогласувајќи ја 2026 година за „година на антидиктатурата“ и победа над автократијата. Тој најави масовен антивладин протест на 24 јануари, повикувајќи ги граѓаните, интелектуалците и младите да се обединат во, како што рече, вистински опозициски фронт за уривање на „наркодиктатурата“.
