Италијанската премиерка Џорџа Мелони денеска изјави дека се согласува со францускиот претседател Емануел Макрон оти Европската Унија треба директно да преговара со Русија доколку напорите на САД за посредување за мир во Украина не резултираат со договор, јави италијанската агенција АНСА.
– Во тој случај мислам дека Макрон е во право. Време е ЕУ да разговара со Русија. Ако Европа одлучи да преговара само со една од двете страни, се плашам дека нејзиниот придонес ќе биде ограничен, изјави Мелони.
Таа нагласи дека клучното прашање е кој треба да ги води преговорите. – Ако направиме грешка да ги обновиме разговорите со Русија и да дејствуваме некоординирано, ќе му направиме услуга на (рускиот претседател Владимир) Путин, рече италијанската премиерка, додавајќи дека последното нешто што го сака е да му помогне на рускиот претседател.
Мелони истакна дека ја поддржува идејата за назначување специјален пратеник на ЕУ за Украина. Воедно, таа ги отфрли тврдењата дека безусловно го поддржува американскиот претседател Доналд Трамп.
– Не се согласувам со Трамп за многу прашања, рече Мелони на годишната прес-конференција, додавајќи дека меѓународното право мора да се штити и дека прекршувањето на правилата ги прави сите поранливи. – Кога не се согласувам со него, му го кажувам тоа, нагласи таа.
Во однос на ЕУ и НАТО, Мелони изјави дека настојува односите со сојузниците да се развиваат во позитивна насока. – Барам напредок, а не назадување, во односите со нашите сојузници, рече таа.
