Израелскиот премиер Бенјамин Нетанјаху во недела ќе отпатува за САД, каде во понеделник ќе се сретне со американскиот претседател Доналд Трамп во Флорида, потврди израелски функционер за француските медиуми. Посетата ќе биде исполнета со разговори за втората фаза од договорот за прекин на огнот во Појасот Газа, како и за регионални безбедносни прашања.
Ова ќе биде петтата средба меѓу Трамп и Нетанјаху во САД откако републиканскиот претседател се врати на функцијата пред скоро една година. „Нетанјаху веројатно ќе дојде да ме посети во Флорида“, изјави Трамп кон средината на декември, осврнувајќи се на својата резиденција Мар-а-Лаго. Според израелскиот весник Једиот Ахронот, двајцата лидери ќе разговараат за Иран, Сирија, либанската милиција Хезболах и за спроведувањето на втората фаза од прекинот на огнот во Газа. Американската администрација и регионалните медијатори, предводени од Египет и Катар, инсистираат на забрзување на процесот.
Примирјето, согласно мировниот план на САД во октомври, го стави крајот на двегодишниот конфликт предизвикан од нападот на палестинската милитантна група Хамас на 7 октомври 2023 година. Сепак, прекинот на огнот останува кревок, со обвинувања од двете страни за негово прекршување. Втората фаза предвидува постепено разоружување на палестинските групи, повлекување на израелската армија од Газа, воспоставување преодна администрација и распоредување на меѓународни сили за стабилизација.
