Утре во земјава се очекуваат краткотрајни врнежи од дожд, поизразени во источните региони, додека на планините и повисоките места ќе врне снег. Во текот на попладнето врнежите ќе престанат. Ќе дува слаб до умерен северен ветер, информира Управата за хидрометеоролошки работи.
Утринските температури ќе се движат од -1 до 6 степени, а дневните ќе достигнат меѓу 3 и 9 степени Целзиусови. Во Скопје се прогнозира минимална температура од околу 3, а максимална до 6 степени. Од петок времето ќе се стабилизира, а за викендот и на почетокот на следната седмица се најавуваат сончеви, но значително постудени утра, со температури под нулата низ целата земја.
