Советот на јавни обвинители ја назначи Наташа Крстевска Цалева за вршител на должноста Виш јавен обвинител на Вишото јавно обвинителство Скопје, до изборот на нов раководител, но најдолго шест месеци. Назначувањето беше единствена точка на дневен ред на денешната 33. седница на Советот.
Одлуката следи откако на 9 декември Советот му ја прекина функцијата на поранешниот шеф Мустафа Хајрулахи по негово барање. Хајрулахи претходно беше суспендиран поради обвинителен акт поднесен од ОЈО Штип за пет дела „малтретирање во вршење на службата“ и едно „злоупотреба на службена положба“.
Тој ги негира обвинувањата и тврдеше дека случајот е политички мотивиран, поврзан со истрагите за бонусите во СЈО. Крстевска Цалева и претходно беше именувана за в.д. шефица на ова обвинителство во февруари, за периодот додека траеше отстранувањето на Хајрулахи.
