Голема француска студија, која опфати речиси 30 милиони возрасни лица, убедливо потврди дека вакцините против Ковид-19 не само што не доведуваат до зголемена стапка на смртност, туку и дека ризикот од смрт од која било причина е значително поголем кај невакцинираните лица.
Истражувањето, објавено во научното списание „Џама нетворк опен“, го спроведе епидемиолошката група „Епи-фаре“, анализирајќи податоци од 2021 до 2025 година.
Групата, која вклучуваше речиси 23 милиони вакцинирани и 6 милиони невакцинирани возрасни лица (18 до 59 години), ги даде следниве резултати:
Смртност кај вакцинирани: 0,4% од вакцинираните лица починале во текот на четиригодишниот период.
Смртност кај невакцинирани: 0,6% од невакцинираните лица починале.
Ова значи дека вкупната стапка на смртност е приближно 50% повисока во групата на невакцинирани лица во однос на вакцинираните.
Махмуд Зуреик, кој го надгледуваше истражувањето, испрати јасна порака:
„Можеме да кажеме со висок степен на сигурност дека нема зголемен ризик од смртност по вакцината против ковид-19… Вакцините со мРНА Модерна и Фајзер против ковид-19 не го зголемуваат долгорочниот ризик од смрт од која било причина.“
Зуреик истакна дека ова истражување е клучно, бидејќи досега не биле проучувани долгорочните придобивки на вакцината.
Овие резултати директно ги побиваат лажните наративи кои долго време тврдеа дека мРНА-вакцините предизвикуваат скриен бран на смрт.
Истражувачите нагласуваат дека, иако резултатите се јасни, студијата не може да докаже дека самата вакцинација директно предизвикала намалување на вкупниот број смртни случаи. Разликата во стапките може да го одразува заштитниот ефект на вакцината, но исто така и демографските и социјалните разлики помеѓу двете групи.
