Помалиот син на македонскиот премиер Христијан Мицкоски, Антониј, е меѓу потешко затруените ученици од скопското основно училиште „Димо Хаџи Димов“ во населбата Влае, објави „НетПрес“. Според информациите, тој бил хоспитализиран и веќе два дена се наоѓа во болница со симптоми на труење и зголемена телесна температура. Во моментов, неговата здравствена состојба е стабилизирана и подобрена.
По утринското известување дека поголем број ученици пријавиле стомачни болки, инспекциските служби на Агенцијата за храна и ветеринарство (АХВ), во координација со Државниот санитарен и здравствен инспекторат, Институтот за јавно здравје (ИЈЗ) и Центарот за јавно здравје, спроведуваат вонреден инспекциски надзор во училишната кујна. Кујната е привремено затворена додека се утврдува можниот извор на труењето.
Според Националниот протокол, ќе се спроведе епидемиолошка анкета и ќе бидат земени мостри од храната, работните површини, приборот и опремата за лабораториско тестирање. АХВ соопшти дека по завршувањето на контролата, јавноста ќе биде информирана за утврдените активности и изречените мерки.
Екипа составена од техничар и епидемиолог од Институтот за јавно здравје и натаму е на терен во ОУ „Димо Хаџи Димов“. Директорката на ИЈЗ, Марија Андоновска, изјави дека се земени брисеви од раце, нос и грло на вработените во кујната, како и брисеви од работните површини. Земени се и мостри од храната што ја консумирале учениците, а на инсистирање на Институтот земени се и мостри од водата.
„Јас сум во постојана комуникација со нашиот тим на терен. Екипата сè уште не се вратила за да можеме да добиеме поконкретни информации, но веднаш е постапено по сите протоколи. Земени се мостри од буквално сè што е од интерес – брисеви од луѓето што работат во кујната, од раце, грло и нос, како и од работните површини и храната што ја консумирале децата. На наше инсистирање земавме и мостри од водата“, изјави Андоновска.
Институциите најавуваат дека по завршувањето на анализите ќе бидат објавени официјалните резултати.
