Првпат во историјата на Henley Passport Index, листата на најмоќни пасоши во светот повеќе не ги вклучува САД во првите десет. САД паднаа на 12. место, израмнети со Малезија, во најновиот квартален извештај.
Листа на најмоќни пасоши во 2025 година:
Сингапур (193 дестинации)
Јужна Кореја (190)
Јапонија (189)
Германија, Италија, Луксембург, Шпанија, Швајцарија (188)
Австрија, Белгија, Данска, Финска, Франција, Ирска, Холандија (187)
Грција, Унгарија, Нов Зеланд, Норвешка, Португалија, Шведска (186)
Австралија, Чешка, Малта, Полска (185)
Хрватска, Естонија, Словачка, Словенија, Обединети Арапски Емирати, Обединето Кралство (184)
Канада (183)
Латвија, Лихтенштајн (182)
Исланд, Литванија (181)
САД, Малезија (180)
Што го прави пасошот моќен? Еден јасен показател е отвореноста за патување – можноста за влегување во дестинации од целиот свет, едноставно, со покажување на пасошот, без потреба од виза.
Индексот на пасоши „Хенли“ е еден од неколкуте што ја мерат таквата моќ на пасошот и првпат во својата 20-годишна историја американскиот пасош испаѓа од првите десет. Три азиски пасоши сега го држат првото место: Сингапур со пристап без виза до 193 дестинации, Јужна Кореја со пристап до 190 дестинации и Јапонија со 189 дестинации.
Во меѓувреме, САД се изедначени на 12. место со Малезија. Граѓаните на двете земји уживаат пристап без виза до 180 од 227 земји и територии следени од индексот. Индексот, составен од лондонската консултантска компанија Henley & Partners, користи ексклузивни податоци од Меѓународното здружение за воздушен транспорт (IATA). Бидејќи „Хенли“ рангира повеќе земји со ист резултат како едно место, всушност 36 земји имаат подобар резултат од САД на оваа листа.
Падот на американскиот пасош е резултат на низа промени во правилата за влез.
„Слабеењето на американскиот пасош во текот на изминатата деценија е повеќе од случајност – тоа е фундаментална промена во глобалната мобилност и динамиката на меката моќ“, рече Кристијан Х. Келин, претседател на Henley & Partners.
„Земјите што ја прифаќаат отвореноста и соработката бргу напредуваат, а оние што се потпираат на минатите привилегии заостануваат“.
Македонија е рангирана на 42. позиција со можност за влез без виза во 129 држави.
Најдобро рангирана земја од регионот е Грција, чиј пасош се најде на 6. место со можност за посета на 186 држави без виза.
Србија е на 36. позиција, со можност да посети 137 држави без виза, Албанија е на 47. место заедно со Босна и Херцеговина, со можност за патување без виза на 122 дестинации. Бугарскиот пасош е на 14, место, со можност за посета на 178 држави без виза. Црна Гора ена 43. место, а со црногорскиот пасош може да се посетат 128 држави без виза, Хрватска и Словенија се на 8. место, со можност за посета на 184 држави без виза.
На дното од листата, на 106. место, Авганистан останува најслабиот пасош со безвизен пристап до само 24 дестинации, две помалку отколку на почетокот на годината. Сирија е на 105. место (26 дестинации), а Ирак е на 104. место (29 дестинации). Јазот во мобилноста помеѓу најдобро и најлошо рангираните пасоши е 169 дестинации.
