Легендарниот пејач на народна музика од Босна и Херцеговина, Халид Бешлиќ, почина на 71-годишна возраст.
Бешлиќ е роден на 20 ноември 1953 година во селото Врапци, општина Соколац. Пораснал во скромни околности, опкружен со традиционални вредности и музика, која го обликувала неговиот пат кон сцената. По отслужувањето на воената служба, се преселил во Сараево, каде настапувал во ресторани и кафулиња, а неговиот топол глас и едноставен стил брзо го направиле препознатлив.
Својата музичка кариера ја започнал крајот на 1970-тите, а во 1981 година го издаде деби албумот „Сиједи старац“. Во текот на 1980-тите, стана едно од најпознатите имиња на југословенската музичка сцена. Неговите песни, меѓу кои „Неќу“, „Неќу дијаманте“ и „Буди буди ивјек сречна“, останаа хитови што сè уште се пеат на свадби и забави низ регионот. Во текот на кариерата објавил 17 албуми.
Војната во Босна и Херцеговина во 1990-тите го одбележа неговиот живот, но наместо да се повлече, тој одржа повеќе од 500 добротворни концерти низ Европа, собирајќи помош за жртвите на војната. По војната продолжи со снимање и настапи, а албумот „Халид 08“ од 2007 година донесе еден од најголемите хитови во неговата кариера – песната „Миљачка“.
Халид се оженил со сопругата Сејда во 1977 година, а нивниот брак останал стабилен низ годините. Еден од најтешките моменти во неговиот живот беше сериозна сообраќајна несреќа во 2009 година, по која го изгуби десното око, но се врати на сцената со голем концерт во Загреб истата година.
Последните денови ги помина во Клиничкиот центар на Универзитетот во Сараево, каде се лекуваше на Одделот за нефрологија и потоа онкологија поради проблеми со црниот дроб. Неколку недели пред смртта, објави и песна посветена на сопругата Сејда, која му беше голема поддршка во животот и кариерата.
Халид Бешлиќ ќе остане запаметен како еден од највлијателните пејачи на народната музика од регионот, чиј глас и песни ќе живеат низ генерации.
