Како дел од конкретните мерки за поддршка на учениците и олеснување на семејниот буџет, Општина Крива Паланка втора година по ред обезбеди бесплатни училишни униформи за сите ученици од основните и средните училишта на територија на Општината, вклучувајќи ги и 120 новозапишани првачиња.
Во духот на континуираната грижа и поддршка на учениците и семејствата, градоначалникот на општина Крива Паланка, Сашко Митовски, денес официјално им ги врачи бесплатните училишни униформи на сите ученици кои се запишани во учебната 2025/2026 година.
Оваа мерка за учениците е дел од поширока образовна политика на Општина Крива Паланка, која континуирано инвестира во подобрување на условите за учење, создавање безбедна и стимулативна средина, како и со практични мерки кои, директно им помагаат на учениците и нивните семејства.
Униформите се изработени од квалитетни и пријатни памучни материјали, прилагодени за целогодишна употреба, а учениците ги пречекаа со големо воодушевување.
Општина Крива Паланка и понатаму останува посветена на создавање подобри услови и можности за унапредување на образованиот процес за младите генерации, како и создавање на поволни стимулативни мерки во насока на олеснување на семејниот буџет на родителите.
