Суд во Тунис осуди 56-годишен маж на смрт поради објави на социјалните мрежи во кои го критикува претседателот Каис Саид, пресуда без преседан што предизвика јавен шок и осуда, потврдија во петокот шефот на Туниската лига за човекови права и адвокатот на мажот.
Осудениот Сабер Чушан, надневен работник со ограничено образование, беше уапсен минатата година поради објави на Фејсбук во кои го критикуваше претседателот.
„Судијата во судот во Набел осуди човек на смрт поради објави на Фејсбук. Тоа е шокантна и невидена пресуда“, изјави неговиот адвокат Осама Бутаља за Ројтерс, додавајќи дека пресудата е обжалена.
Министерството за правда сè уште не даде коментар за случајот.
Иако туниските судови повремено изрекуваат смртни казни, ниту една не е извршена повеќе од три децении.
Пресудата предизвика бран критики
Семејството на осудениот е во неверица. „Не можеме да веруваме“, рече братот на Сабер, Џамал Чучан. „Ние сме семејство кое страда од сиромаштија, а сега на сиромаштијата се додадени угнетувањето и неправдата“.
Пресудата веднаш предизвика бран критики и исмејување на социјалните мрежи. Многу активисти и граѓани веруваат дека ова е намерен обид за заплашување на критичарите на претседателот Саид и предупредуваат дека ваквите драстични мерки би можеле дополнително да ја задушат слободата на изразување и да ги продлабочат политичките тензии во земјата.
Откако претседателот Саид го распушти избраниот парламент во 2021 година и почна да владее со декрет, Тунис се соочува со сè поголеми критики од организациите за човекови права за ерозија на независноста на судството.
Опозицијата го нарече преземањето на власта од страна на Саид државен удар, а повеќето опозициски лидери, етикетирани како предавници од страна на претседателот, се во затвор по разни обвиненија.
