Ова не е предизборна кампања, туку почеток на едукативната онлајн игра „Градоначалник“ која преку симулација на реални сценарија ја зголемува свесноста за одговорното одлучување.
„Политичката едукација не е само за политичарите, таа е пред се за граѓаните. Оваа игра се обидува да ги подучи пред се младите за одговорно одлучување и управување на локално ниво“, велат од LEAD – Здружение Лидери за едукација, активизам и развој, кои ја истакнуваат потребата од едукативна алатка која ги става играчите во улога на градоначалници при што секој одговор е избор што носи последица. Играта е достапна онлајн и е наменета за млади, студенти, активисти и сите оние кои сакаат да размислуваат критички, да ги разберат последиците од носење јавни одлуки и да развијат свест за значењето на изборот.
Станува збор за онлајн симулација која го соочува играчот со конкретни прашања и ситуации од локалното управување: етички дилеми, партиски притисоци, урбанистички планови, јавни услуги, транспарентност, социјални политики и многу други. Секој избор носи позитивна или негативна последица и реална доза на влијание врз граѓаните, „градот“ и сопствениот углед на самиот градоначалник.
Наместо пасивно следење на политичките случувања, „Градоначалник“ овозможува развивање на критичката мисла и активно виртуелно искуство каде што секој може да осознае колку е тешко, но и колку е важно да се управува одговорно. „Нашата цел не е да создадеме идеални политичари, туку свесни, информирани и ангажирани млади кои ќе го разбираат светот околу себе и ќе бидат подготвени да го менуваат.“, истакнуваат LEAD.
„Суштината е едноставна: играта е интересна, но и поучна – затоа што секој од нас, како гласач и граѓанин, секојдневно прави избори кои се одразуваат на заедницата во која живееме.“
Играта е достапна на следниот линк: https://gradonachalnik.lead.org.mk/
Оваа активност се спроведува во рамки на проектот „LEAP – Локално учество, активизам и вклученост“, имплементиран од страна на Здружение Лидери за едукација, активизам и развој кој се спроведува со поддршка од Европска унија преку Фондацијата Центар за демократија како координатор на проeктот „Регионален младински дијалог за Европа“.
