Повеќе од две децении граѓаните на Скопје на секои локални избори слушаат исти ветувања, но голем дел од нив остануваат само на хартија.
Меѓу таканаречените „вечни ветувања“ предничи изградбата на метро или трамвајски систем, идеја која од 2000 година до денес ја најавија сите градоначалници, но без реална реализација.
Друг симбол на неисполнети изборни програми е Универзална сала, чија реконструкција е ветувана во секој изборен циклус, но речиси 25 години таа стои незавршена и претставува потсетник за неисполнетите ветувања на локалната власт.
Граѓаните слушаат и за изградба на катни гаражи, кои се ветуваат во десетици, а се градат минимално. Вардариште, пак, со години е тема во кампањи – најавувано како парк или зелен појас, но останува запуштено.
Чистиот воздух, решавањето на дивите депонии, нови паркови и велосипедски патеки исто така се дел од повторливите изборни програми кои не ја видоа целосната реализација.
Со секоја кампања се повторуваат истите ветувања, а граѓаните остануваат со истите проблеми – метрополата без метро, културен дом без сала и град без доволно зелени површини.
