По последниот случај на фемицид во Велес, општеството се соочува со уште една трагична потсетување за последиците од насилството врз жените. Феминизмот не е закана, туку повик за еднаквост и правда – за свет каде што жените ќе можат да живеат без страв и со достоинство. Насилството врз жените е општествен проблем, кој произлегува од векови на нерамноправност, стереотипи, молк и игнорантност на институциите.
Андреј Јанков се огласи на социјалните мрежи со порака упатена до родителите и општеството, нагласувајќи ја важноста на воспитувањето на момчињата и градењето на здрави вредности. „Како татко на син, знам дека татковството носи со себе огромна одговорност, не е мое само да го нахранам, облечам и испратам на училиште, туку пред сè да му покажам што значи да се биде човек и маж“, пишува Јанков.
Тој додава дека фемицидот, покрај неспособноста на институциите, е и резултат на недоволното воспитување и емоционална незрелост. Родителите имаат должност да им покажат на своите деца:
- дека жената не е трофеј или предмет,
- дека љубовта не е поседување,
- дека љубомората и посесивноста не се љубов, туку болест,
- дека достоинството на друг човек е неприкосновено,
- дека одбивањето мора да се прифати како сосема нормално.
„Нашите синови мора да разберат дека зрелоста не е во тоа да ја добиеш секоја девојка што ќе ја посакаш, туку во тоа да ја почитуваш онаа што ќе ти каже ‘не’. Јас го учам мојот син дека силата на мажот не е само во мускулите, туку во способноста да ја контролира својата агресија“, додава Јанков.
Феминизмот и воспитувањето на новите генерации се меѓусебно поврзани – само преку едукација и создавање емпатични, одговорни момчиња може да се спречи насилство во иднина. Родителите се повикуваат да разговараат со своите деца за љубовта, границите и почитта, бидејќи подобро е да се води навидум непријатен разговор дома, отколку да се доживее трагедија надвор.
Општеството мора да се мобилизира – институциите да реагираат, родителите да воспитуваат, а јавноста да не молчи. Стоп за насилството врз жените – време е за вистинска еднаквост и почит кон секоја личност.
