Партијата ЗНАМ на денешната прес-конференција ги претстави носителите на советничките листи за претстојните локални избори во скопските општини и во Град Скопје.
Портпаролот Никола Мемов соопшти дека Извршниот одбор донел одлука партијата да настапи со сопствени листи во вкупно 53 општини, плус Градот Скопје.
Најголемо внимание привлече носителот на советничката листа за Скопје – генерал Горанчо Котевски, поранешен началник на Генералштабот на Армијата.
За останатите скопски општини, ЗНАМ предложи:
- во Аеродром – Љупчо Марковски Калц, поранешен фудбалер,
- во Центар – Крумислав Мишко Барзов, познат познавач на автомобилската индустрија,
- во Карпош – Јасмин Циривири, хирург ортопед во ГОБ „8 Септември“,
- во Бутел – Ѓорги Чековски, поранешен кошаркар,
- во Гази Баба – Зоран Доневски, пензиониран началник во полицијата,
- во Ѓорче Петров – Тони Симиќ, поранешен кошаркар,
- во Кисела Вода – Сашо Петровски, приватен стопанственик,
- во Чаир – Николче Наумов, адвокат.
Извршниот одбор на ЗНАМ донел и одлука за поддршка на независниот кандидат за градоначалник на Кочани, д-р Влатко Грозданов, за кого претходно поддршка најави и ВМРО-ДПМНЕ.
Освен Котевски, на листата за Градот Скопје се најдоа и професори како Билјана Андреска-Богданоска и Горан Ајдински, доктори како Злате Мехмедовиќ, како и кошаркарскиот тренер Марин Докузовски.
