Со потресен јавен апел, Верица Трифунова – мајка на трагично загинатата Моника Спасова – побара активирање на Коалицијата за правично судење и вклучување на граѓанскиот сектор во борбата за, како што рече, правдата за нејзината ќерка и за сите 62 загинати лица во трагичниот настан.
„Мојот ангел не почина од болест, туку беше убиен од корупцијата и криминалот“, рече Трифунова, повикувајќи ги професорката Биљана Ивановска, професорот Злате Димовски и поранешната антикорупционерка Слаѓана Тасева да бидат дел од мониторинг служба која ќе го следи целиот судски процес – од обвинителните акти до донесувањето на пресудите.
„Професорке Ивановска и професоре Димовски, од дното на душата ве молам – станете дел од борбата за правда за моето дете. На колена ве молам, бидете мониторинг што ќе следи сѐ – мојата ќерка беше убиена затоа што не припаѓаше на корумпираната мафија“, напиша Трифунова.
Според неа, Моника била посветена на чесна и праведна борба, но поради тоа, некој ѝ го одзел животот, оставајќи ја нејзината ќерка без мајка.
Во апелот се споменува и Европската Унија, од која таа бара да се вклучи и финансиски во надгледувањето на процесот, со цел да се обезбеди објективност и транспарентност.
„Моника сега е со Бога, и се надевам дека од таму се бори против злото. Јас нема да престанам додека не ги видам вистинските убијци изведени пред правдата“, заклучува мајката Верица Трифунова.
