Министерот за надворешни работи и надворешна трговија и потпретседател на ВМРО-ДПМНЕ, Тимчо Муцунски, коментирајќи го случајот со претседателката на Државната комисија за спречување на корупцијата (ДКСК), Татјана Димитровска, која е осомничена за оддавање службена тајна во случајот „Адитив“, истакна дека ова е сериозен удар врз интегритетот на институцијата, но и потврда дека институциите не постапуваат селективно.
„Разочарувачки е тоа што го слушаме. Но, истовремено охрабрува тоа што институциите немаат ни најмала селективност за кого било – и за овој и за други случаи, кои вклучуваат како поранешни, така и актуелни високи функционери,“ рече Муцунски.
Според него, отварањето на вакви случаи го актуелизира прашањето за етиката и моралот кај носителите на јавни функции. Муцунски подвлече дека јавните функционери треба да се раководат не само од законите, туку и од повисоки морални стандарди, кои подразбираат лична и професионална одговорност.
„И кога некој е предмет на предистражна или истражна постапка, потребно е тој да размисли веднаш да поднесе оставка – не затоа што е веќе осуден, туку затоа што тоа е морално исправно. Перцепцијата на јавноста дека никој не е над законот е подеднакво важна колку и самата ефективност на институциите,“ нагласи шефот на дипломатијата.
Муцунски оцени дека тоа што Димитровска е под истрага е сериозен сигнал за потребата од повисока политичка и институционална култура. Сепак, тој предупреди дека не треба да се изведуваат колективни заклучоци за целата Антикорупциска комисија поради однесувањето на еден нејзин член.
„Некоректно е врз основа на потенцијално сторено кривично дело од страна на еден поединец, да се гради перцепција за сите членови на Комисијата. Тие имаат и понатаму одговорна улога и треба да продолжат со својата работа со интегритет и професионалност,“ рече Муцунски.
Инаку, Димитровска е осомничена дека преку Вибер и Ватсап комуникација му оддавала службени тајни на друг обвинет во предметот „Адитив“. Откако Обвинителството за гонење организиран криминал и корупција ја прошири истрагата за уште три лица, таа беше изведена пред судија на претходна постапка во Основниот кривичен суд во Скопје. Судот ѝ определи мерки за претпазливост, со кои ѝ е забрането да има контакт со предмети, пошта и друга документација поврзана со работењето на Антикорупциска, како и да гласа или да распределува предмети.
