Општина Аеродром започна целосна реконструкција на паркот Бановина во населбата Лисиче, како дел од поширокиот план за унапредување на урбаната инфраструктура во општината.
Реконструкцијата опфаќа обнова на фонтаната – и на хидрауличниот систем и на нејзиниот надворешен изглед. Летниковците ќе добијат нов лик, збогатени со шаховски маси за дружење, а паркот ќе биде хортикултурно освежен за пријатен престој низ целата година.
За најмладите се поставуваат нови елементи во детското катче, со посебен акцент на безбедноста, а ќе бидат заменети и старите клупи и канти за отпадоци.
Во склоп на реконструкцијата, ќе биде уредена и црквата во паркот, која ќе добие осветлување и ќе биде ставена во функција на верниците.
Општина Аеродром најавува дека ова е само почеток – во следниот период ќе бидат реконструирани сите паркови во општината, создавајќи зелени оази за одмор и дружење на жителите.
